ጥር 25/2004 ዓ.ም.

ቅዱሳት መጻሕፍት ከሥጋዊ አስተሳሰብ የተለዩ ለትምህርት፣ ለተግሳጽ ልብንም ለማቅናት፣ በጽድቅም ላለው ምክር የሚጠቅሙ ናቸው፡፡ /1ጢሞ.3፥16/ ያላወቁትን ለማወቅ፣ የበደሉትን ይቅር በለኝ ለማለት፣ ጠማማውን ልብ ለማቅናት፣ በእውነት መንገድ ለመጓዝ የሚያገለግሉ ቅዱሳት መጻሕፍት አሥራው ወይም ቀኖናውያንና አዋልድ ተብለው በሁለት ይከፈላሉ፡፡

አሥራው መጻሕፍት ሕግጋት፣ መመሪያ፣ የእግዚአብሔር ዓላማና እቅድ ጠቅለል ተደርጎ የቀረበባቸው ሲሆኑ አዋልድ መጻሕፍት ደግሞ “ከመጽሐፍ ቅዱስ ሐሳብና እውነታ ሳይወጡ ኀይለ ቃሉንና ውስጠ ምስጢሩን የሚተረጉሙ፣ የሚያብራሩ፣ የሚተነትኑ ናቸው፡፡” /ዳንኤል 1999፥64/ እምቅ፣ ጥቅልና ምስጢራዊ የሆነው መጽሐፍ ቅዱስ በትርጓሜ መጻሕፍት፣ በጸሎት መጻሕፍት፣ በገድላት፣ በድርሳናትና መሰል ጽሑፎች ተብራርተው፣ ተተንትነው ሲቀርቡ የይዘት ለውጥ ባይኖርም በባህል፣ በእድገት ደረጃ በመልክአ ምድራዊ አቀማመጥ፣ በኑሮ ዘይቤ አንፃር ሊለያዩ ይችላሉ፡፡ የሚያመጣው ልዩነት የይዘት፣ የአስተምህሮ፣ የነገረ ሃይማኖት እንዳይሆን ንባብንም ሆነ ትርጓሜን እንደ ሥጋ ፈቃድ ከመሔድ መቆጠብ ይገባል፡፡ ቅዱሳት መጻሕፍት ቅዱሳን ሰዎች በመንፈስ ቅዱስ ተመርተው እንደጻፉት የሚተረጉሙትም በመንፈስ የሚመሩ መሆን ይገባቸዋልና፡፡

በማኅበረ ቅዱሳን አዘጋጅነት ከጥር 16-18 ቀን 2004 ዓ.ም ድረስ  የግቢ ጉባኤያት ተማሪዎች የንስሐ አባቶች ሴሚናር   በማኅበረ ቅዱሳን ዋናው ማእከል  ተካሔደ ፡፡

በማኅበረ ቅዱሳን የሀገር ውስጥ ማዕከላት ግቢ ጉባኤያት ማደራጃና ማስተባበሪያ ዋና ክፍል ሓላፊ የሆኑት ዲያቆን አንዱአምላክ ይበልጣል እንደገለጡት የንስሐ አባቶች በከፍተኛ ትምህርት ተቋማት የሚገኙ ተማሪዎችን ዘመኑን የዋጀ ትምህርት እንዲያስተምሩና አባታዊ ተልእኳቸውን እንዲወጡ ሴሚናሩ እንደሚያግዛቸው አብራርተዋል፡፡ በተጨማሪም በሥልጠናው ላይ የተገኙ ካህናት ከተለያዩ ቦታ የመጡ በመሆናቸው በአንድ የሥልጠና ቦታ ተገኝተው ልምዳቸውን እንዲለዋወጡና እንዲመካከሩ ለማድረግ ታስቦ የተዘጋጀ ሴሚናር መሆኑን ገልጠዋል፡፡